Masnachwyr yn gweld effaith gadarnhaol Ffos Caerffili ar y dref

Perchnogion busnes o fewn ac o amgylch y farchnad newydd yn gweld cynnydd yn nifer yr ymwelwyr

Mae masnachwyr ym marchnad cynwysyddion newydd Caerffili yn dweud eu bod wedi sylwi ar gynnydd yn nifer y siopwyr yn y dref ers agor y safle ym mis Ebrill.

Mae Ffos Caerffili, sy’n gartref i dros 20 o fasnachwyr lleol gan gynnwys Joe’s Plant Place a The Circular Studio, wedi cael effaith ar y gymuned mewn cyfnod byr iawn – gyda’r safle eisoes ar restr fer gwobr manwerthu.

Dywedodd Joe Carey, perchennog Joe’s Plant Place yn Ffos: “Fel rhywun sydd wedi treulio’r rhan fwyaf o’u bywyd yng Nghaerffili, roedd pwyslais ar fynd i Gaerdydd ar y penwythnos bob amser.”

“Mae Ffos wir wedi cael effaith wrth berswadio pobol i dreulio nos Wener yn y dref”.

Mae’r gyrchfan manwerthu wedi’i henwebu yng nghategori prosiectau manwerthu/hamdden gwobrau Offsite Awards 2024, a gynhelir ar 17 Medi yn y Coventry Building Society Arena.

Mae’r gwobrau’n cydnabod y prosiectau gorau o fewn y sector adeiladu, ac mae Ffos yn cystadlu yn erbyn datblygiadau o bob rhan o’r DU.

Mae busnesau yn y farchnad wedi teimlo’r newid yn y dref; Mae Samantha Eastcott, a aned ac a fagwyd yng Nghaerffili ac sy’n berchennog The Circular Studio yn Ffos Caerffili, wedi profi ei effaith yn uniongyrchol.

Meddai: “Mae Ffos wedi gwneud Caerffili yn fwy o gyrchfan nag yr oedd o’r blaen”.

“Fel rhywun o’r dref, mae Caerffili yn bendant yn teimlo’n fwy bywiog ers ei agor”.

Agorodd perchennog busnes lleol, Martin Rees, ail fusnes yn Ffos Caerffili a dywedodd:

“Dwi’n ddigon ffodus i fod berchen ar y stondin hufen iâ yn y farchnad – mae Ffos wedi bod yn ychwanegiad newydd gwych i’r dref, ac mae hefyd wedi golygu bod mwy o ymwelwyr yn ymweld â’n bwyty.”

Crëwyd Ffos Caerffili yn rhannol i helpu i ddod â chymuned Caerffili at ei gilydd – ac mae masnachwyr wedi eu plesio gan gefnogaeth y bobl leol. Dywedodd Joe: “Gallwch weld yr effaith; mae wir yn gymuned sy’n cael ei dwyn ynghyd.”

Gyda cherddoriaeth fyw, gweithdai ac amrywiaeth o fwyd yng nghanol Caerffili, mae masnachwyr yn gweld sut mae wedi helpu i ddenu mwy o bobl i Gaerffili.

Ychwanegodd Joe: “Dwi’n gweld pobl yn dod i mewn o 5pm ymlaen ar nos Wener ac yn treulio eu noson yn Ffos; mae’n wych.”

Y farchnad yw’r gyntaf o’i bath yng Nghaerffili ac mae’n nodi datblygiad cyntaf Cynllun Creu Lleoedd Tref Caerffili 2035, gyda chymorth ariannol gan Fenter Trawsnewid Trefi Llywodraeth Cymru a Chronfa Datblygu Rhanbarthol Ewrop.

Am fwy o wybodaeth am Ffos Caerffili, ewch i’w Instagram: Ffos Caerffili (@ffoscaerffili)

I gael rhagor o wybodaeth am Gynllun Creu Lleoedd Tref Caerffili 2035, ewch i’w gwefan: Ynghylch Caerffili 2035 – Tref Caerffili 2035