Cyngor yn Dod Ynghyd ag Elusen ‘Gathering Place’ i Gryfhau Cefnogaeth i Deuluoedd

Advertisement

Mae Cyngor Castell-nedd Port Talbot wedi dod ynghyd ag elusen leol yng Nghastell-nedd i gynnig help llaw i deuluoedd sy’n wynebu heriau yn ystod yr argyfwng costau byw parhaus.

Mae’r elusen, a elwir yn ‘Gathering Place’, yn fenter dan ysgogiad y gymuned sy’n darparu eitemau hanfodol, ble gall pobl fynd ag eitemau’n rhad ac am ddim. Gall pobl ddethol hyd at bum eitem am ddim bob wythnos, sy’n cynnwys gwisgoedd ysgol, teganau, llyfrau, dillad, cewynnau ac eitemau hanfodol eraill.

Yn ogystal, mae’r Gathering Place yn darparu llefydd i eistedd ble gall teuluoedd ac unigolion fwynhau te neu goffi am ddim, a chael cyfle i gwrdd â phobl eraill yn y gymuned leol. Maen nhw hefyd yn cynnal sawl grŵp amrywiol i gefnogi rhieni newydd a dosbarthiadau addysgol.

Mae Cyngor Castell-nedd Port Talbot wedi helpu i gefnogi’r cynllun hwn gyda’r Tîm O Gwmpas y Teulu ymroddedig a gweithwyr cefnogi arferion yn ymuno gyda’r Gathering Place i wella’r gwasanaethau sydd ar gael i deuluoedd. Ymhellach, fe sefydlodd y tîm fanc gwisg ysgol yn y Gathering Place. Gall rhieni sy’n wynebu anawsterau ariannol gael gafael ar wisgoedd ysgol am ddim ar gyfer eu plant, gan leihau ymhellach faich costau byw.

Mynegodd y Cynghorydd Sian Harris, Aelod Cabinet Cyngor Castell-nedd Port Talbot dros Wasanaethau Plant a Theuluoedd, gan ddweud: “Pan fydd hi’n amser caled, mae’n hanfodol ein bod ni’n dod ynghyd fel cymuned i gefnogi’r bobl sy’n ei chael hi’n anodd.

“Mae ein partneriaeth gyda’r ‘Gathering Place’ yn dyst i’n hymrwymiad i deuluoedd lleol. Rydyn ni eisiau sicrhau nad oes yr un plentyn yn gorfod mynd heb eitemau hanfodol fel gwisg ysgol, a bod gan deuluoedd fynediad i’r eitemau sydd eu hangen arnyn nhw yn ystod yr adeg heriol hon.”

Lleolir y Gathering Place yn 18 Stryd y Frenhines, Castell-nedd (SA11 1DL), ac mae’n agored i breswylwyr bob dydd Llun 9am i 1pm, dydd Mercher 12pm i 4pm, a dydd Gwener 1pm i 4pm.

I gael mwy o wybodaeth am y ‘Gathering Place’ a’r gwasanaethau a ddarperir ganddo, ewch i www.thegatheringplaceuk.org